Rrahën një person dhe i morën makinën, arrestohen dy vëllezër në Tiranë

Dy vëllezër të cilët akuzohen se rrahën dhe i morën makinën një personi janë vënë në prangat e policisë së Tiranës.

Efektivët e komisariatit Nr. 6, ditën e djeshme, pas marrjes së njoftimit se një shtetas e kishin dhunuar dhe më pas i kishin marrë automjetin, kanë organizuar operacionin e koduar “Motivi”, për zbardhjen e rastit, identifikimin dhe kapjen e autorëve.  

Si rezultat i operacionit, u lokalizuan, u kapën dhe u vunë në pranga vëllezërit B. H., 44 vjeç dhe E. H., 36 vjeç, të dy banues në Tiranë.   

Nga hetimet dyshohet se dy vëllezërit, në garazhin e një pallati në Yzberisht, për motive të dobëta, kanë dhunuar shtetasin I. Zh., 41 vjeç, dhe më pas i kanë marrë automjetin atij.  

 Automjeti i vjedhur u gjet afër banesës së dy vëllezërve dhe u sekuestrua në cilësinë e provës materiale.    

Lidhur me këtë ngjarje materialet iu referuan Prokurorisë së Tiranës, për veprën penale “Vjedhja me dhunë”, kryer në bashkëpunim.