Abuzuan me ndihmat për të prekurit nga tërmeti, në pranga 2 policë dhe 1 zjarrfikës

Shërbimi i Çështjeve të Brendshme dhe Ankesave ka bërë të mundur mbrëmjen e djeshme arrestimin e 2 punonjësve policie, 1 punonjës të Shërbimit Zjarrëfikës, si dhe ka proceduar penalisht 2 shtetase për veprat penale të “Mashtrimit” dhe “Shpërdorimit të detyrës”.

Policia sqaron se arrestimi i tyre u krye pas hetimeve të zhvilluara në lidhje me publikimin e një videoje në media, ku shfaqeshin pamje të transportimit e përvetësimit të një sasie të konsiderueshme pakosh ushqimore të destinuara për banorët e prekur nga situata e tërmetit. SHÇBA bëri të mundur arrestimin në flagrancë të shtetasve: – A.Z., me detyre Shef i Seksionit të Rendit pranë Komisariatit të Policisë Rinas, për veprën penale të “Mashtrimit në bashkëpunim”; – E.H., me detyrë Komandant skuadre në Seksionin e Rendit pranë Komisariatit të Policisë Rinas për veprën penale “Shpërdorim detyre”; – A.T., me detyrë punonjës i shërbimit zjarrfikës pranë PMNZSH Kombinat, për veprën penale të “Mashtrimit, e kryer në bashkëpunim”. Gjithashtu janë proceduar në gjendje të lirë shtetaset V.Z. dhe Sh.T. për veprën penale të “Mashtrimit”, kryer në bashkëpunim. Materiale hetimore pritet t’i dërgohen prokurorisë së Tiranës për veprime të mëtejshme hetimore