Tavo: Mirënjohës të gjithëve, jeni shtysë e forcë për të shërbyer më shumë

<p>Kryebashkiaku i ri i Himarës, Vangjel Tavo, falënderoi votuesit përmes një postimi në rrjetet sociale. Tavo shprehet se ka marrë shumë urime nga mijëra njerëz, që i konsideron shtysë e forcë për të shërbyer më shumë.</p> <blockquote> <p>Të nderuar miq, dashamirës e mbështetës kudo që jeni,<br /> Kam marrë prej jush me mijëra e mijëra mesazhe urimi përmes telefonit celular dhe rrjeteve sociale, e ju jam tejet mirënjohës për çdo urim, fjalë e inkurajim, e mbi të gjitha për sinqeritetin dhe dashamirësinë e thellë njerëzore që keni përçuar përmes tyre, që më kanë ngazëllyer e gëzuar pa masë e më kanë bërë të ndihem një njeri i privilegjuar me kaq shumë e shumë miq në katër anët e vendit, në shtetet fqinje, si edhe në kontinentet e largëta.<br /> Sepse, a nuk është kjo pasuria më e madhe që mund të ketë njeriu?! A nuk është pikërisht kjo trashëgimia më e vyer që mund të lihet në këtë jetë?! Dhe, a ka bekim më të madh se sa të kesh kaq shumë bashkëudhëtarë të përzemërt në rrugëtimin njerëzor?!</p> <p>Në pamundësi fizike për t’ju falënderuar individualisht po jua shpreh mirënjohjen time publikisht: Faleminderit të gjithëve nga zemra!<br /> Faleminderit gjithsecili prej jush. E ju uroj shëndet e mbarësi në jetën dhe familjet tuaja. Dhe kurrë mos e harroni se dashamirësia dhe respekti juaj ndaj meje janë reciproke.<br /> Ju e vlerësoni dhe e konsideroni Vangjel Tavon mik, ndërsa unë ju siguroj se e konsideroj gjithsecilin prej jush mik të vërtetë dhe shtysë e forcë për të shërbyer më shumë, për të drejtuar më mirë, e për t’i shpenzuar të gjitha energjitë e mia në përmirësimin e jetës së banorëve të thjeshtë dhe zhvillimin dhe transformimin e komunitetit.<br /> Përgjithmonë mirënjohës!</p> <p>Përulësisht,<br /> Vangjel Tavo</p> </blockquote>