Një shtetas egjiptian, banues në Krujë, është arrestuar nga Policia e Shtetit, pasi dyshohet se organizonte dhe transportonte kundrejt pagesës emigrantë të paligjshëm, kryesisht nga Egjipti, me qëllim kalimin e tyre drejt vendeve të Bashkimit Evropian.
Sipas policisë, për të shmangur kontrollet, 34-vjeçari i transportonte emigrantët një nga një.
Arrestimi u krye në flagrancë gjatë operacionit të koduar "Organizatori", në autostradë, pranë Rinasit.
Në momentin e ndërhyrjes, shtetasi me inicialet A. H. po transportonte drejt Shkodrës një shtetas egjiptian.
Gjatë operacionit u sekuestrua edhe telefoni celular i të arrestuarit, i cili pritet t'u shërbejë hetimeve për zbardhjen e plotë të veprimtarisë së tij.
Nga hetimet paraprake dyshohet se 34-vjeçari organizonte dhënien e ndihmës për shtetas të huaj, kryesisht egjiptianë, për të kaluar në mënyrë të kundërligjshme kufijtë shqiptarë, me destinacion vendet e Bashkimit Evropian.
Policia bën të ditur se hetimet vijojnë për dokumentimin e plotë të aktivitetit kriminal dhe identifikimin e personave të tjerë të përfshirë në këtë rrjet.
Materialet procedurale i janë referuar Prokurorisë së Tiranës për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
