Elbasan/ Sekuestrohet mbi 1 kg kanabis i ndarë në doza, shpallet në kërkim 40-vjeçari

Një rrjet i shitjes së lëndëve narkotike në doza është goditur në qytetin e Elbasanit, në kuadër të operacionit të koduar “Shitblerja”. Shërbimet e Policisë kanë sekuestruar mbi 1 kilogram kanabis, armë gjahu, thikë si dhe shuma parash në lekë e euro, ndërsa kanë shpallur në kërkim poseduesin e drogës dhe kanë vënë në hetim dy klientë të tij.

Operacioni është zhvilluar nga specialistët e Seksionit për Hetimin e Narkotikëve, në bashkëpunim me Seksionin për Mbështetjen Operacionale të Hetimit dhe Forcat “Shqiponja”, nën drejtimin e Prokurorisë.

Gjatë ndërhyrjes së forcave të rendit, është ushtruar kontroll i rreptë në banesën e shtetasit Klodjan Novaku, 40 vjeç, banues në Elbasan. Në cilësinë e provës materiale, policia gjeti dhe sekuestroi brenda shtëpisë së tij: 1 kilogram e 130 gramë lëndë të dyshuar narkotike Cannabis Sativa (një pjesë e ndarë gati për shitje), 1 peshore elektronike që shërbente për ndarjen e dozave, 1 armë gjahu që posedohej pa lejen e organeve kompetente, 71 700 lekë dhe 100 euro, të dyshuara si të përfituara nga aktiviteti kriminal.

Në momentin e bastisjes së banesës, 40-vjeçari nuk u gjet aty dhe policia po punon intensivisht për lokalizimin dhe prangosjen e tij. Gjatë operacionit rreth zonës, shërbimet "Shqiponja" kanë ndaluar dhe proceduar në gjendje të lirë dy shtetas që dyshohet se po blinin lëndë narkotike tek 40-vjeçari: B. D., 37 vjeç, u kap në afërsi të banesës së të shpallurit në kërkim teksa po shkonte për të blerë drogë. Gjatë kontrollit fizik, policia i gjeti dhe i sekuestroi një armë të ftohtë (thikë) dhe A. S., 20 vjeç, u kap po ashtu pranë shtëpisë së shpërndarësit, teksa kishte me vete një sasi kanabisi që dyshohet se sapo e kishte blerë nga shtetasi K. N.

Materialet procedurale i kanë kaluar tashmë Prokurorisë për ndjekje të mëtejshme penale ndaj të tre shtetasve të përfshirë.