Ministria e Mbrojtjes e Kosovës e ka mohuar faktin se dronët “Bayraktar” kanë vëzhguar bazat e ushtrisë serbe, siç ka pretenduar presidenti i Serbisë, Aleksandër Vuçiç, raportojnë mediat në Kosovë.
“Nuk qëndron lajmi që ne operojmë apo koordinojmë me ndokënd operime jashtë kufijve të Kosovës. Qëllimi i kapaciteteve tona ajrore është mbështetja e operacioneve brenda territorit të Kosovës”, thuhet në një përgjigje me shkrim nga kjo ministri për The Geopost.
Po ashtu, në përgjigje theksohet se Forca e Sigurisë së Kosovës në kuadër të saj ka Njësinë e Sistemeve Ajrore pa pilot.
“Kjo njësi është e dizajnuar për të operuar me fluturaket, pa pilot dhe normalisht realizon operime edhe me dronët TB2”.
Ndryshe, presidenti serb potencoi ditë më parë se dronët “Bayraktar” TB-2 të cilët Qeveria e Kosovës i ka blerë nga Turqia, më 5 dhe 6 qershor janë ngritur në lartësi prej 5800 metra me synimin për të vëzhguar pozicionin e ushtrisë serbe.
“I kemi shikuar si pëllëmbën e dorës dhe po të ishte ndonjë kohë tjetër nuk do të qëndronin gjatë në ajër, pasi është hapësira ajrore nën kontrollin e KFOR-it, ne e respektojmë hapësirën e KFOR-it, ata po bëjnë punën e tyre, ne po bëjmë tonën.
Ndryshe, vitin e kaluar, kryeministri i Kosovës, Albin Kurti, pati prezantuar dronët Bayraktar TB-2 të cilët Qeveria i kishte blerë nga Turqia.
Sa dronë i ka blerë Kosova nga Turqia nuk dihet, por “Bayraktar-i“ turk, është prezantuar zyrtarisht në njërën nga bazat e FSK-së.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
