Policia e Tiranës ka njoftuar se është finalizuar një tjetër fazë e operacionit të koduar “Relay”, për goditjen e veprimtarisë kriminale të dhënies ndihmë shtetasve të huaj për kalim të paligjshëm të kufijve.
Gjatë operacionit u sekuestruan automjeti me të cilin transportoheshin emigrantët dhe 3 telefona celularë.
Specialistët e Seksionit për Hetimin e Trafiqeve të Paligjshme, si rezultat i administrimit të menjëhershëm të informacionit të siguruar në rrugë operative, se një shtetas transportonte emigrantë kundrejt pagesës, finalizuan fazën e nëntë të operacionit “Relay”.
Në kuadër të kësaj faze, u arrestua në flagrancë shtetasi turk me inicialet G. K., 26 vjeç, i cili u kap në aksin rrugor “Kashar–Thumanë”, duke transportuar me automjet, kundrejt pagesës 3000 euro për person, 3 emigrantë që synonin të lëviznin në mënyrë të kundërligjshme drejt vendeve të BE-së.
Në bashkëpunim me Prokurorinë, vijojnë hetimet për të identifikuar dhe nxjerrë përpara përgjegjësisë penale shtetas të tjerë që mund të jenë përfshirë në këtë rast.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
