Pitbulli kafshon të moshuarin në Durrës, gjen vdekjen nga plagët e marra (VIDEO)

Një i moshuar në Durrës, ka gjetur vdekjen si pasojë e plagëve të marra nga sulmi i pësuar nga një qen Pitbull më 2 nëntor.

Bëhet fjalë për një 84-vjeçar i identifikuar si Halil Basha, i cili nuk arriti që t’u mbijetojë plagëve të marra pavarësisht ndihmës së dhënë, duke gjetur vdekjen ditën e sotme.

Lidhur me ngjarjen policia ka arrestuar pronarin e qenit Armand Lala, ndërkohë që hetimet janë në vijim.

Me datën 02.11.2023, është marrë njoftimi se, në sektorin hekurudha e pikërisht në një rrugë lagje, një qenë i racës Pitbull kishte dalë nga rrethimi i banesës së shtetasit Armand Lala dhe kishte sulmuar dhe kafshuar shtetasin Halil Basha, të cilin e kishin dërguar menjëherë në urgjencën e spitalit rajonal Durrës.

Për ngjarjen u ngrit grupi hetimor dhe është shkuar në vendin e ngjarjes, ku është konstatuar një sipërfaqe në formë të çrregullt me gjak me përmasa 1x1 metër dhe në vendin e ngjarjes, në këtë sipërfaqe shikohet që barishtet janë të shtypura si pasojë e përleshjes së qenit me personin e dëmtuar.

Në këtë sipërfaqe me anë të një tamponi të sterilizuar u morr material biologjik i ngjashëm me atë të gjakut.

Ndërkohë për zbardhjen e ngjarjes shërbeu dëshmia e një shtetase, e cila pa të moshuarin duke e kafshuar qeni.

Ajo deklaroi para hetuesve se përballë skenës kishte ardhur një automjet me ngjyrë gri me drejtuese një femër, e cila e ka goditur qenin, duke e larguar.

Duke u gjendur përballë kësaj situate dëshmitarja ka njoftuar policinë dhe ambulancën, të cilët kanë shkuar menjëherë dhe e kanë dërguar në Urgjencën e Spitalit Rajonal Durrës shtetasin Halil Basha.

Dëshmitarja ka deklaruar se ka parë qenin duke e kafshuar shtetasin Halil Bash në kokë dhe në trupë.

Mësohet se Lala ka tre qenë Pitbull të cilët i ka rritur vetë dhe se në momentin e ngjarjes ndodhej në punë ndërsa qentë i kishte lënë brenda rrethimit të banesës.