Shfrytëzonin të huajën për prostitucion në apartamentin me qira, dy të arrestuar në Tiranë

Dy persona në Tiranë, të cilët shfrytëzonin një vajzë nga Azerbajxhani për prostitucion, janë vënë në prangat e policisë.

Pas një hetimi me metoda proaktive, uniformat blu të kryeqytetit kanë organizuar dhe finalizuar operacionin e koduar “Network 3”. 

Në kuadër të këtij operacioni u arrestuan shtetasit R. F., 20 vjeç dhe A. S., 39 vjeç, banues në Tiranë.

Nga veprimet hetimore ka rezultuar se këta dy shtetas në bashkëpunim me njëri-tjetrin, shfrytëzonin për prostitucion një shtetase nga Azerbajxhani, e cila e ushtronte prostitucionin në një apartament me qira në rrugën “Mihal Duri”.

Në cilësinë e provës materiale u sekuestruan një shumë parash të dyshuara të përfituara nga kjo veprimtari e paligjshme dhe 4 celularë.

Materialet procedurale iu referuan Prokurorisë së Tiranës, për veprime të mëtejshme