Një person është arrestuar dhe një tjetër është shpallur në kërkim në Krujë, pasi nga një operacion i Policisë në fshatin Nojë janë sekuestruar 145 kg hashash dhe municion luftarak.
Fotot e dokumentuara nga polcia në vendngjarje, pasqyrojnë se droga ishte gati për shitje, e paketuar dhe e futur në bidonë.
Me këtë rast policia ka arrestuar në flagrancë kryeplakun e fshatit Nojë dhe ka shpallur në kërkim shtetasin Bujar Sefa (Xaka).
Njoftimi i policisë, Krujë
Finalizohet operacioni policor i koduar "Noja", për goditjen e veprimtarisë kriminale në fushën e narkotikëve.
Operacioni i zhvilluar nga strukturat e DVP Durrës dhe shërbimet e Komisariatit të Policisë Krujë, në bashkëpunim me strukturat e SHÇBA-së.
Sekuestrohet një sasi prej 145 kg lëndë narkotike cannabis sativa dhe municion luftarak.
Arrestohet në flagrancë kryeplaku i fshatit Nojë, shpallet në kërkim 1 shtetas tjetër.
Strukturat e DVP Durrës dhe shërbimet e Komisariatit të Policisë Krujë, në bashkëpunim me strukturat e SHÇBA-së, në vijim të punës për goditjen e aktivitetit kriminal në fushën e prodhimit dhe shitjes së lëndëve narkotike, bazuar në informacionet e siguruara në rrugë policore, mirorganizuan punën dhe finalizuan me sukses operacionin policor të koduar "Noja", në kuadër të të cilit u arrestua në flagrancë shtetasi:
H. M., 66 vjeç, banues në fshatin Nojë, Krujë, me detyrë kryeplak i fshatit Nojë, për veprat penale "Shpërdorim detyre" dhe "Prodhimi dhe shitja e narkotikëve".
Gjithashtu u bë shpallja në kërkim e shtetasit B. S.(X)., 34 vjeç, banues në Nojë, Krujë, për veprat penale "Prodhimi dhe shitja e narkotikëve" dhe "Armëmbajtje pa leje".
Shërbimet e Policisë, gjatë kontrollit të ushtruar në banesat e tyre, gjetën dhe sekuestruan në cilësinë e provës materiale një sasi prej 145 kg lëndë narkotike cannabis sativa, gati për shitje, si dhe municion luftarak.
Vijon puna për dokumentimin e plotë të kësaj veprimtarie kriminale dhe kapjen e shtetasit të shpallur në kërkim.
Materialet i kaluan Prokurorisë së Rrethit Gjyqësor Krujë, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
