Policia e Tiranës ka finalizuar operacionin e koduar “Taksimetri”, duke dokumentuar veprimtarinë kriminale të një 27-vjeçari të dyshuar si autor i gjashtë vjedhjeve me armë dhe dhunë në Tiranë, Krujë dhe Durrës.
Operacioni u zhvillua ngjarjes së një dite më parë në aksin rrugor Tiranë-Elbasan, ku një pasagjer kanosi me mjet prerës drejtuesin e një taksie dhe i mori para si dhe varësen që mbante në qafë.
Autori i dyshuar, shtetasi T. M., 27 vjeç, u lokalizua dhe u kap pak pas ngjarjes, i fshehur në fshatin Qeha.
Hetimet e mëtejshme zbuluan se i riu dyshohet të jetë autor edhe i pesë vjedhjeve të tjera të kryera gjatë muajit qershor.
Sipas Policisë, ai ka vjedhur para në tregun e Fushë-Krujës, ka grabitur me kanosje biznese në Tiranë, si dhe ka sulmuar drejtues taksish në Fushë-Krujë dhe Durrës, duke u marrë para, telefona celularë, ora dore dhe sende me vlerë.
Gjatë operacionit u sekuestruan varësja e vjedhur dhe një telefon celular, ndërsa hetimet vijojnë për të zbardhur plotësisht aktivitetin kriminal të 27-vjeçarit dhe për të verifikuar përfshirjen e tij në ngjarje të tjera të ngjashme.
Materialet procedurale i janë referuar Prokurorisë së Tiranës për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
