Policia ka arrestuar sot një shtetas me inicialet E.K, 29 vjeç, pasi dyshohet të ketë ndihmuar autorin e vrasjes së ndodhur në Kavajë, Habib Rexhën, i cili qëlloi për vdekje në një lokal Arjan Gosën. Dyshohet se i arrestuari e ka marrë autorin në automjetin e tij. Automjeti u gjet dhe u sekuestrua në cilësinë e provës materiale.
Në njoftim thuhet:
Specialistët për Hetimin e Krimeve të Komisariatit të Policisë Kavajë, në vijim të veprimeve hetimore të kryera në drejtimin e Prokurorisë, për zbardhjen e rrethanave të ngjarjes së ndodhur më datë 21.05.2023, në një lokal, ku mbeti i vrarë një shtetas, bazuar në provat e siguruara gjatë hetimit dhe në informacionet e siguruara nga inteligjenca informative, kanë ndaluar shtetasin E. K., 29 vjeç, banues në Kavajë, për veprën penale “Përkrahja e autorit të krimit”.
Nga veprimet hetimore ka rezultuar se ky shtetas ka ndihmuar autorin e vrasjes, shtetasin H. R. (i ndaluar ditën e djeshme) që të largohej nga vendi i ngjarjes pas kryerjes së krimit, duke e marrë në automjetin e tij. Automjeti u gjet dhe u sekuestrua në cilësinë e provës materiale. Gjithashtu, shërbimet e Policisë kanë gjetur vendin e armës së përdorur nga autori për vrasjen e shtetasit A. G., dhe po punojnë për nxjerrjen e saj. Materialet shtesë i kaluan Prokurorisë, për veprime të mëtejshme”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
