Kishte menduar çdo gjë në detaj: ku do të qëndronte, si do të sillej si dhe ku do ta qëllonte. Efektivi i policisë kishte menduar edhe largimin nga vendngjarja, duke lënë automjetin ndezur në derën e komisariatit, ndërsa 30 fishekë i kishte lënë në sediljen e parë të makinës.
Ludian Zaimi, i cili qëlloi për vdekje brenda në komisariatit numër 3, kolegun e tij, do të pëgjigjet për akuzën e vrasjes me paramendim. Provat e mbledhura por edhe pamjet filmike të kamerave të sigurisë brenda ambienteve të komisaritatit tregojnë se autori kishte menduar mirë çdo lëvizje të tij.
Në pamjet filmike shfaqen momentet e ngjarjes së rëndë brenda komisariatit nr.3, ku mbeti i vrarë Çaush Saliasi, 55 vjeç. Prokurorët thanë se makina e tij personale është gjendur e ndezur dhe e parkuar para ambienteve të godinës policore, edhe pse aty ndalohej qëndrimi i mjeteve. Ndërsa brenda automjetit të Ludian Zaimit, prokurorët kanë sekuestruar dhe një sasi fishekësh.
Edhe pse pas arrestimit autori shfaqi shenja pendese për vrasjen, ai deklaroi se ndihej i cenuar psikologjikisht dhe se kjo ishte akumuluar prej kohësh. Zaimi ka pretenduar se Çaushi e kishte quajtur qorr disa herë.
Drejtues të lartë të këtij komisaritati thanë se autori shfaqej një person i tërhequr dhe jo shumë social. Prej më shumë se një viti e gjysmë, ai ushtronte detyrën si polic i thjeshtë i patrullës së përgjithshme në Komisariatin 3.
Ditën e enjte, ai do të paraqitet në gjykatën e rrethit ku pritet të caktohet edhe masa e sigurisë. Ndaj tij rëndon një akuzë që parashikon dënimin jo më pak se 20 vjet deri në burgim të përjetshëm.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
