Shpërndanin droga të forta, dy të arrestuar në Fier

Goditet një tjetër rast i shpërndarjes së drogave të forta, në doza në Fier, duke vënë në pranga dy persona.

Në vijim të punës për goditjen e aktivitetit kriminal në fushën e prodhimit dhe shpërndarjes së lëndëve narkotike, bazuar dhe në informacionet e grumbulluara në rrugë policore për dy shtetas që posedonin dhe shpërndanin lëndë narkotike heroinë, në qytetin e Fierit, Seksioni për Hetimin e Narkotikëve në DVP Fier, në bashkëpunim me Komisariatin e Policisë Fier dhe Seksionin Operacional në DVP Fier, organizuan dhe finalizuan me sukses operacionin policor të koduar “Corner”, në kuadër të të cilit u bë kapja dhe arrestimi në flagrancë i Artan Mërtiri, 45 vjeç, banues në Celigradë, Fier dhe Ervis Tika, 32 vjeç, banues në Grecalli, Fier.

Të dyshuarit janë kapur dhe arrestuar në flagrancë nga shërbimet e policisë, në lagjen “15 Tetori”, Fier, duke i shitur lëndë të dyshuar narkotike heroinë, shtetasit Aldo Hamzaj, 24 vjeç, banues në Fier, i cili u procedua penalisht në gjendje të lirë.

Gjatë kontrollit fizik të Artan Mërtirit dhe Ervis Tikës, si dhe gjatë kontrollit në banesat e tyre, shërbimet e Policisë gjetën dhe sekuestruan në cilësinë e provës materiale, dhjetëra doza me lëndë të dyshuar narkotike heroinë, paketime (kuti shkrepësesh) që shërbenin për ndarjen në doza të lëndës narkotike, një shumë e konsiderueshme parash të valutave të ndryshme, me vlerë rreth 2.600.000 lekë të rinj, 10 aparate celulare dhe 2 peshore elektronike.

Ndaj të dyshuarve materialet i kaluan Prokurorisë Fier, për veprime të mëtejshme, për veprën penale “Prodhimi dhe shitja e lëndëve narkotike”, kryer në bashkëpunim.