Aksident në aksin Lezhë-Milot, makina përplas biçikletën; plagoset rëndë 66-vjeçari

Një aksident i rëndë është regjistruar paraditen e sotme në aksin rrugor Lezhë–Milot, pranë kryqëzimit të Rrilës.

Një automjet tip "Benz", me targa të Kosovës, ka përplasur një biçikletë me të cilën po lëvizte një 66-vjeçar. 

Si pasojë e përplasjes, i moshuari, i identifikuar si Preng Ndreka, banues në Shënkoll, ka mbetur i plagosur rëndë.

Fillimisht, Ndreka është transportuar në spitalin e Lezhës, ku ka marrë ndihmën e parë mjekësore.

 Për shkak të gjendjes së rëndë shëndetësore, ai është dërguar më pas me urgjencë në Spitalin e Traumës në Tiranë për trajtim të specializuar.

Drejtuesi i automjetit është shoqëruar nga Policia, e cila ka nisur hetimet për zbardhjen e plotë të rrethanave dhe shkaqeve të aksidentit.