I kërkuari për drogë i fshihet policisë, kapet nga “Running” në Fier

Një person i shpallur në kërkim për drogë, është vënë në prangat e policisë së Fierit, gjatë operacionit të koduar “Running”.

Mbi bazën e informacioneve të siguruara në rrugë policore, në bashkëpunim dhe me Seksionin për Hetimin e Narkotikëve në Policinë e Fierit, u organizua dhe u finalizua me sukses operacioni policor i koduar “Running”, si rezultat i të cilit u bë kapja dhe ndalimi i shtetasit të shpallur në kërkim Besmir Sopi, 30 vjeç, banues në Zhupan, Fier.   

30-vjeçari pasi ka parë forcat e policisë, ka tentuar të largohet duke u fshehur në një zonë me bimësi të dendur, por është kapur dhe ndaluar nga shërbimet e policisë.

Gjykata e Shkallës së Parë Fier, me vendimin e datës 12 prill 2021, e ka dënuar me 3 vjet e 2 muaj burgim, për veprën penale “Prodhimi dhe shitja e lëndëve narkotike”.

Në datën 29 shtator 2020, gjatë kontrollit në banesën e këtij Sopit, në Zhupan, policia gjeti dhe sekuestroi 3 kilogramë kanabis sativa, gati për shitje.

Ndaj të dyshuarit hetimet janë në vijim, ndërkohë që materialet iu referuan Prokurorisë për ndjekje të mëtejshme.