Pengmarrja në Kamëz/ RENEA arreston një person, një tjetër në kërkim

Vihen në pranga dy të dyshuar për pengmarrjen 10 ditë më parë në Kamëz, ndërsa ende nuk ka asnjë gjurmë nga pengu, Jan Prenga.

Leonard Hajri u arrestua ditën e sotme pas aksionit të Policisë dhe forcave RENEA në zonën e Shijakut, në një kompleks "Golden" në pronësi të tij dhe të vëllait Altin Hajri, ky i fundit i shpallur poashtu në kërkim. Në pranga ra edhe djali i tyre i xhaxhait.

 Policia kishte dyshime se Prenga mbahej peng pranë këtij kompeksi për evente, ndërsa raportohet se në kompleksin e tyre u sekuestruan edhe tre armë zjarri.

Dyshohet se pengmarrja e tij lidhet me aktivitetin kriminal të dy vëllezërve të tij të cilët aktualisht ndodhen në burg në Angli të arrestuar për trafikim lëndësh narkotike.

Prenga u rrah dhe më pas u mor peng nga dy vëllezërit Altin dhe Leonard Hajri me makinë, në rrugën “London” 10 ditë më parë.

Para pengmarrjes ka pasur një konflikt me sende të forta mes 2 pengmarrësve dhe 49 vjeçarit, ku njëri prej tyre ka mbetur dhe i plagosur pasi në vendin e ngjarjes janë gjetur shenja gjaku.

Aktualisht ende nuk ka asnjë gjurmë të personit të rrëmbyer, sakaq kujtojmë se 2 ditë pas rrëmbimit automjeti i autorëve “Range Rover” i denoncuar i vjedhur, është gjetur i djegur në Durrës.

Pista kryesore që po hetohet aktualisht është lidhja me vëllezërit e tij dhe pazaret e tyre të pambyllura të drogës.