U kërkua shuarja e masës së sigurisë, GJKKO rrëzon kërkesën e Berishës

GJKKO ka rrëzuar kërkesën e avokatëve të Sali Berishës, për shuarjen e masës së sigurisë ndaj ish-kryeministrit. 

Ndërkaq, avokatët e Sali Berishës kanë depozituar kërkesën për përjashtimin e gjyqtares Irena Gjoka.

Në një prononcim për mediat avokati Genc Gjokutaj tha:

"Ne filluam seancën me pak vonesë pasi gjykata ishte në një gjykim tjetër, bëmë kërkesë paraprake për përjashtimin e gjyqtares Irena GJoka, Është depozituar kërkesa.

Ka detyrë të heqi dorë, por nuk e bëri këtë veprim. Kjo gjyqtare është shkarkuar nga detyra nga Sali Berisha kur ishte President”.

(10:20) Meta në SPAK, GJKKO mban seancën për Berishën/ Kërkohet shuarje e masës së sigurisë 

Ka nisur rreth orës 10:00 në GJKKO seanca ku do të vendoset mbi kërkesën e dy avokatëve të Sali Berishës, për shuarjen e masës së sigurisë ndaj këtij të fundit. 

Në seancë janë paraqitur dy avokatët Sokol Mëngjezi dhe Genc Gjokutaj, ndërkohë që s’është i pranishëm Berisha. Këto zhvillime vijnë në një kohë kur kreu i Partisë së Lirisë, Ilir Meta, vazhdon të jetë në SPAK për çështjen CEZ-DIA. 

Në një raportim për MCN Live gazetari Arsen Rusta bën me dije:

Kjo datë 8 nëntor 2023 ka një simbolikë. Për herë të parë në më shumë se tre dekada, qysh nga nisja e karrierës politike të ish-kryeministrit dhe ish-Presidentit Berisha dhe ish-kryeministrit dhe ish-Presidentit Meta, sot ndodhen të dy në ambientet e Gjykatës së Posaçme, të Prokurorisë së Posaçme. Ka nisur seanca për Sali Berishën, ku përmes avokatëve të tij ai kërkon që të shuhet masa e sigurisë me argumentin se ajo s’është ekzekutuar prej më shumë se 10 ditësh dhe e ka humbur efektin e saj. Është një kërkesë që do shqyrtohet nga gjyqtarja Irena Gjoka. Teksa ka nisur gjyqi për ish-kryeministrit Berisha, në SPAK po zhvillohet seanca e deklarimeve për Metën. Ndoshta për koiçidencë apo për një mesazh, apo është thjesht rastësi ajo që ka ndodhur ditën e sotme, por këto procese vijnë edhe pas mbërritjes së gjysmës së prokurorisë së posaçme nga një vizitë në DASH dhe zyrat e Departamentit të Drejtësisë në SHBA”.