Në kërkim ndërkombëtar për tentativë vrasje dhe drogë, dy persona ekstradohen nga Franca dhe Kosova

Dy persona të shpallur në kërkim ndërkombëtar janë ekstraduar nga Franca dhe Kosova. Si rezultat i bashkëpunimit të Interpol Tirana me Interpol Paris, u bë ekstradimi nga Franca, i shtetasit E. G. alias E. Sh., 34 vjeç.

34-vjeçari ishte shpallur në kërkim ndërkombëtar nga ZQK Interpol Tirana, pasi Gjykata e Rrethit Gjyqësor Lezhë, me vendimin e datës 4 shkurt 021, i ka caktuar masën e sigurimit “Arrest në burg”, për veprat penale “Vrasja”, mbetur në tentativë dhe “Prodhimi dhe mbajtja pa leje e armëve dhe municioneve luftarake”. 

Shtetasi Esmir Gabor alias Esmir Sherri, në janar 2021, në lagjen “Nënë Tereza”, Lezhë, ka tentuar të vrasë me armë zjarri shtetasin E. P.  

Specialistët e Seksionit për Hetimin e Krimeve të Rënda në DVP Lezhë kanë ekzekutuar vendimin e Gjykatës së Rrethit Gjyqësor Lezhë, në ngarkim të këtij shtetasi, për veprat penale “Vrasja”, mbetur në tentativë dhe “Prodhimi dhe mbajtja pa leje e armëve dhe municioneve luftarake”.

Gjithashtu, nga Interpol Tirana, falë bashkëpunimit me autoritetet ligjzbatuese kosovare, u bë ekstradimi nga Kosova drejt Shqipërisë, i shtetasit Sh. Islami, 49 vjeç.   

Ky shtetas ishte shpallur në kërkim ndërkombëtar nga ZQK Interpol Tirana, pasi Gjykata e Rrethit Gjyqësor Pogradec, me vendimin e datës 13.08.2021, i ka caktuar masën e sigurisë “Arrest në burg”, për veprën penale “Trafikimi i narkotikëve”.

49-vjeçari ishte shpallur në kërkim në kuadër të operacionit antidrogë të koduar “Hudënishti”, finalizuar më 8 gusht 2021, në Pogradec, si rezultat i të cilit u ndaluan dy persona, u shpallën në kërkim 3 të tjerë dhe u sekuestruan në cilësinë e provës materiale 23 kilogramë lëndë e dyshuar narkotike kanabis, e destinuar për t'u trafikuar jashtë vendit.

Specialistët për Hetimin e Krimeve në Komisariatin e Policisë Pogradec kanë ekzekutuar vendimin e Gjykatës së Rrethit Gjyqësor Pogradec, në ngarkim të këtij shtetasi, për veprën penale “Trafikimi i narkotikëve”.