Vatra e zjarrit në zonën pyjore të fshatit Dardhë, në Bashkinë e Librazhdit, vijon të mbetet aktive prej gjashtë ditësh, ndërsa forcat e emergjencës po punojnë pa ndërprerje për vënien e saj nën kontroll.
Dhjetëra efektivë të shërbimit zjarrfikës të Librazhdit, të mbështetur nga strukturat e Emergjencave Civile, janë angazhuar në terren për izolimin e vatrave aktive dhe parandalimin e përhapjes së mëtejshme të flakëve.
Përpjekjet e tyre janë vështirësuar nga kushtet atmosferike, të cilat kanë favorizuar përhapjen e zjarrit në një sipërfaqe të gjerë me bimësi të thatë dhe pyje.
Gjithashtu, terreni i thyer malor e ka bërë të pamundur ndërhyrjen në disa zona me mjete zjarrfikëse, duke detyruar ekipet të punojnë në këmbë për të frenuar avancimin e flakëve.
Fatmirësisht, deri më tani nuk raportohet për persona të lënduar. Sipas autoriteteve, vatra e zjarrit ndodhet larg zonave të banuara dhe, për momentin, nuk ka rrezik për banesat.
Ndërkohë, strukturat përgjegjëse vijojnë monitorimin e situatës dhe operacionin për shuarjen e plotë të zjarrit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
