Një bisedë telefonike dhe kafja që ishte duke konsumuar biznesmeni Ardian Nikulaj pak pas mesditës së 19 Prillit do të mbeteshin në mes.
Ai ndodhej në ambientet e brendshme të lokalit të tij Coral në plazhin e Shëngjinit, ndërsa një vrasës gjakftohtë i kamufluar si postier do ti merrte jetën.
Janë këto pamjet se si vrasësi ende i paidentifikuar dhe në kërkim e qëllon me 7 plumba Nikulajn e më pas largohet me pistoletën në dorë.
E gjithë ngjarja është e filmuar dhe ndodhur në sytë e vjehrrit të të ndjerit, ndërsa pas shoqërimit të mbi 20 personave policia e shtetit dhe prokuroria e Lezhës ende s’kanë arritur të zbardhin ekzekutorin e këtij krimi.
FactCheck mëson se autori është larguar me këtë motorr që shihni në pamje targat e të cilit rezultojnë të vjedhura disa kohë më parë dhe janë targa greke EPP 480.
Verifikimet në terren dërguan hetuesit deri në fshatin Kukël ku dhe humbin gjurmët e të dyshuarit për vrasjen. Aty është fiksuar një fuoristradë Range Rover për të cilën në media u raportua se fshehu motorin dhe mori vrasësin.
Ndërsa hetuesit kanë mundur të zbulojnë se ai mjet i përkiste dy turistëve Zvicerian që kishin qenë për të vizituar zonën e Kukël dhe s’kanë asnjë lidhje me krimin.
Fillimisht kjo ngjarje u hetua në tre pista, ajo e gjakmarrjes, vrasjes me sfond politik dhe përplasjeve me grupe kriminale rivale të biznesmenit Nikulaj.
Pasditja e 26 Prillit, një javë nga atentati do të hidhte dritë mbi një krim ndërkombëtar. Nikulaj ishte ekzekutuar me pagesë, nga një vrasës serial portugez në një skemë të ndërtuar në Britaninë e Madhe dhe të ekzekutuar mes Tiranës, Shkodrës dhe Shëngjinit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
