Pesë të arrestuarit për rrëmbimin dhe vrasjen e Jan Prengës janë njohur sot me vlerësimin e masës së sigurisë përpara trupës gjykuese të Dhomës Penale. Gjyqtari pranoi kërkesën e prokurorisë për të lënë në burg, Leonard Hajrin, Bajram Hajrin, Elton Hajrin, Olsi Turjan dhe Festim Bexhdilin, i cili dyshohet se groposi trupin e pajetë të Jan Prengës.
Provat kryesore që ka në dorë organi i akuzës janë paraqitur në seancën paraprake, kundër të arrestuarve për pengmarrjen dhe vrasjen e Jan Prengës. Prokuroria disponon disa foto bardh e zi të shkëputura nga kamerat e sigurisë, të cilat ka arritur t’i sigurojë në resortin "Golden" në Shijak ku u mbajt peng, dhe më tej dyshohet të jetë nxjerrë i pajetë, 49-vjeçari Prenga.
Arben Hoxha, mbrojtësi në gjykatë i të pandehurit Elton Hajri, kushëri me vëllezërit Leonard Hajri dhe Altin Hajri, ky i fundit i shpallur në kërkim, deklaroi se klienti i tij nuk ka asnjë lidhje me ngjarjen.
Ndërkohë për rrëmbimin e Jan Prengës më 17 janar, ngjarje e ndodhur në Kamëz, Policia deri më tani ka shpallur në kërkim 10 persona.
Por nga ana tjetër familjarët e 49-vjecarit Prenga presin me ankth gjetjen e trupit të pajetë të të afërmit të tyre, teksa kërkimet deri më tani kanë rezultuar të pasuksesshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
