Osmani dekoron familjen Jashari: Kosova nuk e harron sakrificën më sublime të historisë sonë moderne

Presidentja e Kosovës, Vjosa Osmani, në nder të 17 vjetorit të Pavarësisë së Kosovës, ka ndarë urdhrin post mortem ‘‘Hero i Kosovës’’ për Shaban Jasharin, kryefamiljarin e familjes Jashari.

Osmani dekoroi familjen Jashari, duke nderuar sakrificën e përbashkët të çdo anëtari të familjes që qëndroi dhe luftoi për lirinë e Kosovës.

Dekoratën nga Presidentja Osmani e ka pranuar Bekim Jashari.

Gjatë fjalimit të saj, Osmani theksoi se familja Jashari është themeli mbi të cilin u ngrit liria e Kosovës.

Një moment i gjallë i sakrificës dhe heroizmit të pashoq. Në historinë e njerëzimit, rrallë herë ka ndodhur që një familje e tërë të flijohet për idealin e shenjtë të lirisë, duke u bërë simbol i qëndresës dhe dinjitetit kombëtar, si dhe motiv për mijëra ushtarë të UÇK-së. Nga plumbi i parë e deri tek qëndresa heroike e marsit 1998, Jasharët nuk u thyen asnjëherë, nuk u zmbrapsën asnjëherë, ata përqafuan pavdekësinë”.

Po ashtu, Presidentja ka dekoruar edhe Fehmi dhe Xhevë Lladrovcin me urdhrin “Hero i Kosovës”.

“Me të njëjtin frymëzim, bazuar në vendimet paraprake, sot i dorëzojmë Urdhrin ‘Hero i Kosovës’ edhe për Fehmi dhe Xhevë Lladrovcin, dy bashkëluftëtarë dhe bashkëshortë që ranë ashtu siç jetuan bashkë, me armët në duar dhe me idealin e lirisë së ngulitur në shpirt.”