Manovra në rrugë dhe drift në mes të qytetit, nis hetimi për dy të rinj në Lezhë

Dy të rinj në Lezhë, kanë rrezikuar jetën e kalimtarëve në rrugë duke bërë manovra të rrezikshme dhe drif në mes të qytetit me makina.

Policia e Lezhës, identifikoi të rinjtë pas publikimit të një videoje në rrjetet sociale, ku shfaqeshin 2 drejtues mjetesh që rrezikonin përdoruesit e tjerë të rrugës dhe prishnin rendin e qetësinë publike duke kryer manovra të rrezikshme me makinat e tyre në rrugë, në "Rrethrrotullimin e Katedrales", Lezhë.

Falë veprimeve të shpejta dhe bashkëpunimit të ngushtë me qytetarët, policia ka bërë të mundur identifikimin e drejtuesve të mjeteve të shfaqur në video dhe proceduan penalisht për veprën penale “Prishja e qetësisë publike”, drejtuesit e mjeteve, shtetasit K. F., 25 vjeç dhe E. B., 22 vjeç, banues në Ishull Lezhë.

Gjithashtu, shërbimet e Policisë kanë bllokuar 2 automjetet dhe për secilin prej drejtuesve kanë vendosur masën administrative 40.000 lekë.

Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme.