Pjesë e “bandës së Niklës”, arrestohet në Dubai Marklen Haka

I njohur si pjesë e bandës së Niklës, arrestohet në Dubai i shumëkërkuari në kuadër të operacionit të koduar “Revanshi”, Marklen Haka.

Autoritetet e Emirateve të Bashkuara Arabe raportohet se i kanë dërguar informacion palës shqiptare për arrestimin e të dyshuarit Marklen Haka si dhe kanë kërkuar të dhëna biometrike për të vërtetuar nëse bëhet fjalë për të njëjtin person të shpallur në kërkim.

Haka rezulton i kërkuar për tentativë vrasje ndaj Durim Bamit dhe si pjesë e një grupi kriminal.

Kujtojmë se në shtator të vitit 2019, Hakës iu bë atentat në derën e shtëpisë, nga ku mori një plumb në krah, ndërkohë që halla e tij Shpresa Basha gjeti vdekjen e kapur nga plumbat e destinuara për nipin e saj.

Në shtator të vitit 2018 Haka u arrestua gjatë një operacioni të shtrirë në fshatrat e Krujës, por pasi vuajti një vit burg u la i lirë në korrik të vitit 2019.

Ndërkohë në vitin 2022 atij ju bë sërish një atentat me armë zjarri, nga ku mori një plumb në nofull.