Një 49-vjeçar i shpallur në kërkim nga autoritetet e Kosovës për kultivim të bimëve narkotike është arrestuar në Tiranë. Bëhet fjalë për shtetasin Oltion Shehu, 49 vjeç, me origjinë nga Tepelena.
Sipas njoftimit të Policisë së Shtetit, arrestimi u bë në kuadër të operacionit të koduar “Operacionalja 69”, të zhvilluar nga Drejtoria e Forcës së Posaçme Operacionale.
“Si rezultat i shkëmbimit të informacionit dhe partneritetit të ngushtë me agjencitë ligjzbatuese në Kosovë, shërbimet e Drejtorisë së Forcës së Posaçme Operacionale kapën në Tiranë shtetasin O. Sh., 49 vjeç, i lindur në Tepelenë,” – thuhet në njoftim.
Shehu ishte shpallur në kërkim nga autoritetet në Kosovë pasi Gjykata Themelore e Gjakovës, në shkurt të vitit 2025, i kishte caktuar masën e sigurisë “arrest në burg” për veprën penale “Kultivimi i bimëve narkotike”.
Interpol Tirana po vijon bashkëpunimin me institucionet ligjzbatuese në Kosovë për finalizimin e procedurave të ekstradimit të 49-vjeçarit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
