“Asnjë cent ma shumë”/ Sot në Kosovë protestohet kundër shtrenjtimit të energjisë elektrike

“Asnjë cent ma shumë” është moto e protestës kundër shtrenjtimit të energjisë elektrike, e cila mbahet sot në kryeqytetin e Kosovës, Prishtinë.

Protesta do të fillojë në orën 12:00 nga sheshi “Zahir Pajaziti” për të vazhduar deri te ndërtesa e Qeverisë së Kosovës.

Në këtë protestë do të kërkohet të mos aprovohet bllok tarifa e propozuar nga Zyra e Rregullatorit të Energjisë ZRRE dhe që të nacionalizohet KEDS-i.

Me 28 janar 2022, Qeveria e Kosovës pritet ta miratojë propozimin e ZRRE-së për shtrenjtimin e bllok tarifës.

Dje kryesuesi i Bordit të Zyrës së Rregullatorit të Energjisë (ZRRE) Ymer Fejzullahu për katër orë ka raportuar në Komisionin për Ekonomi të Kuvendit të Kosovës, ku e ka arsyetuar propozimin për shtrenjtimin e rrymës nga 1 shkurti 2022 deri më 1 mars 2023, me faktin se kanë qenë të detyruar për këtë ngritje të çmimit.

Lidhur me çështjen e shtrenjtimit të energjisë kryeministri i Kosovës, Albin Kurti ka thënë se shumë shpejt do të dërgojnë komentet tek ZRRE, në lidhje me vendosjen e tarifave të reja të energjisë elektrike.