Kisha e Shën Gjergjit në Rras të Butë, në Lezhë, është rindërtuar nga themelet, duke rikthyer në jetë një prej objekteve të rëndësishme të trashëgimisë fetare dhe kulturore të kësaj treve.
Kisha shekullore ishte shkatërruar gjatë periudhës së komunizmit, ndërsa sot, pas shumë vitesh, ajo i rikthehet komunitetit falë kontributit dhe përkushtimit të banorëve të Rrasit dhe Zimjave.
Për komunitetin, rikthimi i kishës së Shën Gjergjit është më shumë se rindërtimi i një objekti kulti. Banorët e konsiderojnë atë një pjesë të rëndësishme të historisë, identitetit dhe traditës së tyre. Nisma dëshmon gjithashtu lidhjen e fortë të komunitetit me trashëgiminë dhe vlerat shpirtërore të kësaj zone.
Kryetari i Njësisë Administrative Ungrej, Agustin Zefi, falënderoi të gjithë ata që kontribuuan në rindërtimin e kishës, duke vlerësuar angazhimin dhe përkushtimin e komunitetit.
Pas përfundimit të punimeve, kisha e Shën Gjergjit u shugurua, ndërsa komuniteti organizoi edhe një festë për të shënuar këtë ditë të veçantë.
Rikthimi i kishës shënon jo vetëm përfundimin e një pune të nisur nga banorët, por edhe ringjalljen e një pjese të rëndësishme të historisë dhe traditës së kësaj treve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
