Një 40 vjeçar është proceduar penalisht pasi është kapur në pikën kufitare në Kapshticë me rreth 22 mijë euro të padeklaruara. Shërbimet e Stacionit të Policisë Kufitare Kapshticë, bazuar në analizën e riskut, në dalje të Republikës së Shqipërisë, kanë kaluar në vijën e dytë, për kontroll të imtësishëm një automjet tip "Opel", me drejtues shtetasin F. D., 40 vjeç, banues në Selanik, Greqi. Gjatë kontrollit, në çantën e dorës së 40-vjeçarit u gjetën 21 800 euro që ai nuk i kishte deklaruar siç përcaktohet në ligj. Shuma monetare u sekuestrua në cilësinë e provës materiale. Veprimet e mëtejshme procedurale u kryen nga specialistët për Hetimin e Krimeve Ekonomiko-Financiare, të Drejtorisë Vendore të Policisë Korçë, të cilët referuan materialet në Prokurori, ku filloi procedimi penal në gjendje të lirë për shtetasin F. D. Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
