KLP emëron drejtuesit e Prokurorisë Gjirokastër, Shkodër dhe Pukë

Këshilli i Lartë i Prokurorisë, ka emëruar drejtuesit e Prokurorisë Gjirokastër, Shkodër dhe Pukë.

Nën drejtimin e kreut të Këshillit Lartë të Prokurorisë, Alfred Balla, mbledhja ka nisur me miratimin unanim të proces-verbalit të seancës plenare të datës 22 prill dhe propozimin e zëvendëskryetarit Tartar Bazaj, për të shtuar në rendin e ditës miratimin e një projekt-akti për veprimtari jashtë funksioni për prokurorin zotin Kledian Llaho.

Mbledhja ka vijuar me miratimin unanim të projekt-akteve për tre caktime të përkohshme në detyrën e Drejtuesve të zyrave të Prokurorive si më poshtë;

- Julian Çafka, në detyrën e Drejtuesit të Prokurorisë pranë Gjykatës së Shkallës së Parë Gjirokastër;

- Lazër Çardaku, në detyrën e Drejtuesit të Prokurorisë pranë Gjykatës së Apelit Shkodër;

- Pierind Çukaj, në detyrën e Drejtuesit të Prokurorisë pranë Gjykatës së Shkallës së Parë Pukë

Më pas, u miratuar unanimisht projekt-akti për një korrigjim gabimi material, në vendimin e KLP-së, Nr.77, datë 22.04.2022, “Për mbarimin e statusit të magjistratit”.

Me propozim të Komisionit të Zhvillimit të Karrierës, u miratuan unanimisht, dy projekt-aktet për caktimin e drejtuesve të zyrave të Prokurorive përmes procedurës me ngritje në detyrë. Përmes kësaj procedure u caktua Durim Bedini, në pozicionin e Drejtuesit të Prokurorisë pranë Gjykatës së Shkallës së Parë Kavajë dhe Aurel Zarka, në pozicionin e Drejtuesit të Prokurorisë pranë Gjykatës së Shkallës së Parë Vlorë.

Në vijim, Këshilli ka miratuar unanimisht projekt- aktin për miratimin e qëndrimit në detyrë të zotit Kujtim Luli.

Gjithashtu, Këshilli ka miratuar në mënyrë unanime edhe dy (2) raporte për analizimin e aftësisë profesionale të subjekteve të rivlerësimit, zonjës Eglantina Shehu dhe zonjës Marjola Mërtiri.

Ndërkohë, sa i takon miratimit të d) projekt-rregulloreve, pas një sërë diskutimesh, Këshilli i Lartë i Prokurorisë, miratoi unanimisht rregullore “Për vlerësimin etik dhe profesional të prokurorëve” si dhe ktheu për diskutim rregulloren “Për komunikimin e Këshillit të Lartë të Prokurorisë me median”.

Me 8 tetë vota pro u miratua projekt-akti mbi miratimin e programit buxhetor afatmesëm 2023-2025 të Këshillit të Lartë të Prokurorisë. Në përfundim të mbledhjes, u miratua me 9 vota pro, projekt-akti për miratimin e veprimtarisë jashtë funksionit për prokurorin zoti Kledian Llaho pranë Prokurorisë Sarandë.