Italia regjistron temperaturën më të lartë në Evropë

Ishulli jugor italian i Sicilisë mund ta ketë regjistruar temperaturën më të lartë në Evropë, prej 48.8 gradë.

Këtë temperaturë e raportuan autoritetet rajonale, por ajo duhet të vërtetohet nga Organizata Botërore e Meteorologjisë, shkruan BBC.

Sipas kësaj organizate, rekordi në fuqi i temperaturës më të lartë të regjistruar ndonjëherë në Evropë është shënuar në vitin 1977 në Athinë të Greqisë.

Vala më e re e vapës në Itali po shkaktohet nga një anticiklon i emëruar Lucifer, i cili po vjen nga Afrika.

Është parashikuar që ky anticiklon të zhvendoset drejt veriut përgjatë pjesës së brendshme të Italisë, duke i rritur temperaturat edhe në qytete si Roma.

Ministria e Shëndetësisë e Italisë ka lëshuar paralajmërime të kuqe për vapë ekstreme në disa rajone dhe numri i qyteteve që përballen me rrezikun nga temperaturat e larta pritet të rritet nga tetë në 15 deri të premten.

Vala e vapës e Mesdheut, e cila në disa shtete i ka sjellë temperaturat më të larta në dekadat e fundit, ka shkaktuar zjarre në natyrë në pjesë të mëdha të jugut të Italisë. Rajonet më të prekura janë Sicilia, Kalabria dhe Pulia.