Lezhë, nxënësit vodhën shkollën/ 5 të mitur grabitën 16 laptopë dhe dy videoprojektorë, në pranga një 22-vjeçar

Policia e Lezhë ka zbardhur autorësinë dhe rrethanat e vjedhjes së konstatuar katër ditë më parë në ambientet e Shkolla “Besëlidhja”.

Në kuadër të operacionit policor të koduar “Pajisjet”, janë proceduar penalisht 5 të mitur, të moshave 15–17 vjeç, tre prej të cilëve rezultojnë të jenë nxënës në këtë institucion arsimor. 

Gjithashtu, është arrestuar si bashkautor shtetasi Arsel Brunga, 22 vjeç, i dyshuar dhe për nxitjen e të miturve në kryerjen e veprës penale.

Sipas autoriteteve, rreth orës 01:00 të datës 14 mars, autorët kanë depërtuar në ambientet e shkollës, duke dëmtuar dyert e objektit, dhe kanë vjedhur 16 laptopë, 2 videoprojektorë, si dhe serverin qendror të kamerave të sigurisë.

Më pas, pajisjet e vjedhura janë transportuar me një automjet tip Volkswagen, në pronësi të 22-vjeçarit, dhe janë fshehur në bodrumin e një pallati në ndërtim, si dhe në banesën e tij.

Policia ka bërë të mundur gjetjen dhe sekuestrimin e 16 prej pajisjeve të vjedhura, si dhe të automjetit të përdorur për transportimin e tyre.