Grabiti me armë një pikë këmbimi valutor në Tiranë, arrestohet 42-vjeçari

Autori i grabitjes së armatosur në një pikë të këmbimit valutor në qendrën “Concord”, në Tiranë, është identifikuar dhe arrestuar nga autoritetet. 

Policia e Tiranës bëri të ditur se operacioni policor i koduar “Itinerari” çoi në identifikimin, lokalizimin dhe arrestimin e autorit, i cili dyshohet se ka vjedhur rreth 3 milionë lekë në një dyqan këmbimi valutor, brenda një qendre tregtare në rrugën “5 Maji”.

Sipas policisë, 42-vjeçari ka kanosur punonjësen e pikës së këmbimit me armë zjarri pistoletë dhe më pas ka marrë shumën e parave.

Nga hetimet rezulton se ai është person me precedent penal për të njëjtën veprimtari kriminale.

Gjatë operacionit janë sekuestruar arma e zjarrit pistoletë, një pjesë e shumës së parave të vjedhura, si dhe veshja që dyshohet se është përdorur gjatë kryerjes së grabitjes.

Shërbimet e Komisariatit të Policisë Nr. 4, menjëherë pas marrjes së njoftimit për vjedhjen, organizuan punën në bashkëpunim me Prokurorinë për identifikimin dhe kapjen e autorit.

Si rezultat i veprimeve të shpejta hetimore dhe operacionale, u bë e mundur kapja dhe arrestimi i shtetasit Luan Maçi, 42 vjeç, banues në Tiranë.

Materialet procedurale i janë referuar Prokurorisë për veprime të mëtejshme.