Një ngjarje e rëndë është regjistruar mesditën e kësaj të mërkure në fshatin Domen të njësisë administrative Postribë, në Bashkinë Shkodër, ku një banesë u shkrumbua nga zjarri, duke shkaktuar vdekjen e tre personave.
Viktimat janë identifikuar si Blerina Çobaj, 24 vjeçe, dhe dy fëmijët e saj të mitur, përkatësisht 3 vjeç dhe 1 vjeç e gjysmë.
Sipas informacioneve paraprake, në momentin kur ka rënë zjarri, 24-vjeçarja dyshohet se ka qenë duke gatuar në banesën e vjetër të familjes. Flakët janë përhapur me shpejtësi, ndërsa nëna dhe dy fëmijët nuk kanë mundur të dalin në kohë.
Menjëherë pas marrjes së njoftimit, në vendngjarje mbërritën shërbimet e Policisë dhe forcat zjarrfikëse. Për shkak të terrenit të vështirë malor, ndërhyrja u bë edhe më e vështirë, ndërsa pas shuarjes së flakëve u nxorën nga rrënojat trupat e pajetë të Blerinës dhe dy fëmijëve të saj.
Grupi hetimor, nën drejtimin e Prokurorisë, po vijon veprimet për të përcaktuar shkakun e saktë të zjarrit dhe për të dokumentuar plotësisht rrethanat e kësaj tragjedie.
Njoftimi i policisë
Rreth orës 13:10, në fshatin Domen, Shkodër, ka rënë zjarr dhe është djegur banesa në pronësi të shtetasit B. Ç.
Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje.
Nga veprimet e para dyshohet se, si pasojë e zjarrit, kanë humbur jetën shtetasja B. Ç., 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë.
Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
