“September” vë në pranga të shpallurin në kërkim nga drejtësia italiane

Një operacion i policisë së Vlorës i koduar “September” ka vënë në pranga një person të shpallur në kërkim ndërkombëtar, me qëllim ekstradimi.

Në kuadër të këtij operacioni, në lagjen “1 Maji”, Vlorë, u bë kapja dhe ndalimi, me qëllim ekstradimi, i shtetasit A. A.(L)., 54 vjeç, banues në Vlorë. 

54-vjeçari ishte shpallur në kërkim ndërkombëtar, pasi Gjykata e Leçe-s, Itali, me vendimin penal të datës 28.01.2022, ka lëshuar urdhër arresti ndërkombëtar, për veprat penale “Trafikimi i lëndëve narkotike” dhe “Organizatë kriminale”, parashikuar nga Kodi Penal i Italisë.  

Interpol Tirana, në bashkëpunim me Interpol Roma, vijon procedurat për ekstradimin e këtij shtetasi drejt Italisë.