Asgjësohen 894 bimë kanabis në Kukës/ Procedohen dy kryetarë fshatrash dhe dy përgjegjës të pyjeve

Në rajonin e Kukësit vijojnë kontrollet antikanabis në të gjithë qarkun, ndërkaq raportohet për finalizimin e fazës së tretë të operacionit “Bjeshkët e Nemuna”. Me këtë rast raportohet se janë asgjësuar nëpërmjet djegies, 894 bimë narkotike cannabis sativa që u gjetën të kultivuara në zona të pyllëzuara, në territoret e fshatrave Gjonpepaj, Lekbibaj dhe Mserr. Në vijim të kontrolleve antikanabis, me shërbime nga toka dhe me dronë, shërbimet e Drejtorisë Vendore të Policisë Kukës kanë finalizuar fazën e tretë të operacionit policor të koduar “Bjeshkët e Nemuna”, në kuadër të të së cilës: -në fshatin Gjonpepaj janë gjetur të kultivuara 178 bimë narkotike cannabis sativa; -në fshatin Mserr janë gjetur të kultivuara 428 bimë narkotike cannabis sativa; -në fshatin Lekbibaj janë gjetur të kultivuara 288 bimë narkotike cannabis sativa. Bimët narkotike, pas kryerjes së veprimeve procedurale, u asgjësuan nëpërmjet djegies. Në vijim të veprimeve procedurale për këto raste, u referuan materialet në Prokurori ku nisi procedimi në gjendje të lirë, për shtetasit P. U. dhe S. S., kryetarë të fshatrave Gjonpepaj dhe Lekbibaj; A. Q. dhe Gj. P., përgjegjësit e shërbimit pyjor në këto dy fshatra, të dyshuar për veprat penale "Shpërdorimi i detyrës" dhe "Moskallëzimi i krimit". Vijojnë veprimet hetimore, me qëllim identifikimin dhe arrestimin e autorëve të këtyre rasteve. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.