Kishin mbjellë 5 mijë rrënjë kanabis, arrestohen dy persona në Malësi të Madhe, dy të tjerë në kërkim

Dy persona janë vënë në prangat e policisë së Malësisë së Madhe në kuadër të operacionit policor antikanabis, të koduar “Koordinata”.

Prangosja e tyre u bë pas kishin kultivuar 5093 bimë narkotike, në fshatin Alijaj, ndërsa u arrestuan në kushtet e flagrancës në parcelë.

Të arrestuarit janë E. Sh., 47 vjeç, dhe K. Sh., 74 vjeç, banues në fshatin Alijaj.

Gjithashtu u procedua në gjendje të lirë shtetasja S. Sh., 57 vjeçe, dhe u shpallën në kërkim vëllezërit B. Sh., 22 vjeç, dhe G. Sh., 25 vjeç, të afërm të gjithë me njëri-tjetrin.

Nga hetimet e kryera, dyshohet se këta shtetas kanë kultivuar 5093 bimë të dyshuara narkotike, të llojit kanabis Sativa, në fshatin Alijaj, në afërsi të banesave të tyre. 

Bimët narkotike u asgjësuan me anë të djegies.