Trafik droge dhe vrasje, OFL u çon formularin 3 të dënuarve durrsakë

Operacioni Forca e Ligjit u ka dërguar ditën e sotme formularin e deklarimit të pasurisë tre shtetasve të dënuar për trafik narkotikësh dhe vrasje me paramendim. Sipas njoftimit të policisë, në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

J.(P.) N., banues në Durrës, i dënuar për veprën penale “Trafikimi i narkotikëve”;

E. N., banues në Durrës, i dënuar për veprën penale “Prodhimi dhe shitja e narkotikëve”;

E. D., banues në Durrës, i dënuar për veprën penale “Vrasja me paramendim”, e kryer në bashkëpunim.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.