Shtyhet seanca për Mario Çelën, GJKKO do verifikojë gjendjen shëndetësore për kërkesën e tij për lirim nga burgu

Gjykata e Posaçme Kundër Korrupsionit dhe Krimit të Organizuar (GJKKO) ka vendosur të shtyjë seancën ndaj Mario Çelës, i cili ka kërkuar zëvendësimin e masës së sigurisë me pretendimin për probleme shëndetësore. 

Gjykata do të caktojë ekspertë mjeko-ligjorë për të përcaktuar gjendjen e tij shëndetësore dhe nëse përmbush kushtet për ndryshimin e masës.

I ekstraduar pak ditë më parë nga Belgjika, Mario Çela, vëllai i Suel Celës, i është drejtuar gjykatës me kërkesë për zëvendësim mase për arsye shëndetësore. 

Ai nuk ishte i pranishëm në seancë dhe u përfaqësua nga avokati Artan Gjermeni, ndërsa nga ana e Struktura e Posaçme Kundër Korrupsionit dhe Krimit të Organizuar (SPAK) ishte i pranishëm prokurori Altin Dumani. 

Aktualisht, Çela ndodhet në Spitalin e Burgjeve, ku po qëndron pas pretendimeve për probleme shëndetësore.

Mario Çela u arrestua në Belgjikë në kuadër të një operacioni të SPAK, ku u lëshuan 21 urdhër-arreste. 

Pak ditë më parë, GJKKO i komunikoi masën e sigurisë “Arrest në burg”, të caktuar në mungesë, për veprat penale “Vrasja me paramendim”, “Organizata kriminale”, “Mbajtja pa leje dhe prodhimi i armëve, armëve shpërthyese dhe municionit” si dhe “Korrupsioni aktiv në sektorin privat”.