Shitje droge dhe lojëra ilegale fati, arrestohen 7 shtetas në Laç

Finalizohet nw qytetin e Laçit operacioni i koduar “Perimetri 2” për goditjen e veprimtarisë kriminale të shitjes së lëndëve narkotike dhe organizimit të kundërligjshëm të lojërave të fatit.

Arrestohen 7 shtetas, ndërsa sekuestrohen lëndë narkotike Cannabis Sativa, 6 automjete, telefona celularë dhe 7 pajisje elektronike për lojëra fati.

Nga hetimet dyshohet se lënda narkotike shpërndahej në zona të ndryshme të qytetit të Laçit, në disa raste edhe pranë shkollave.

Sektori për Hetimin e Narkotikëve, Seksioni i Mbështetjes Operacionale dhe Sektori i Forcës së Posaçme “Shqiponja” në DVP Lezhë, në bashkëpunim me Forcat e Ndërhyrjes së Shpejtë (FNSH) Tiranë dhe Prokurorinë pranë Gjykatës së Shkallës së Parë të Juridiksionit të Përgjithshëm Lezhë, finalizuan operacionin policor të koduar “Perimetri 2”.

Operacioni u zhvillua pas disa muajsh hetime me metoda speciale, bazuar në informacione të siguruara në rrugë operative për disa shtetas që ushtronin aktivitet kriminal në shitjen e lëndëve narkotike në doza, në qytetin e Laçit.

Si rezultat i veprimeve hetimore dhe operacionale, u dokumentua ligjërisht kjo veprimtari kriminale, duke çuar në ndalimin e 4 shtetasve dhe arrestimin në flagrancë të 2 të tjerëve, të gjithë banues në Laç, Kurbin, të dyshuar për veprën penale “Prodhimi dhe shitja e narkotikëve”, kryer në bashkëpunim.

Sipas hetimeve, këta shtetas siguronin lëndë narkotike Cannabis Sativa, të cilën e ndanin në doza dhe e shpërndanin në zona të ndryshme të qytetit, përfshirë edhe afër shkollave.

Gjatë operacionit u zbulua gjithashtu një lokal ku organizoheshin lojëra fati me kompjuterë, në kundërshtim me ligjin. Për këtë rast u arrestua pronari i lokalit, babai i dy prej të arrestuarve, i cili nuk e kishte regjistruar subjektin dhe punonjësit në organet kompetente.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.