Shqiptari në Itali kthen banesën në laborator, kapet me 40 kg drogë

Dy shqiptarë në Milano kanë përfunduar në prangat e Policisë italaine pasi janë kapur me drogë.

Sipas mediave italiane në pranga janë vënë B.L., 45 vjeç dhe J.S., 27 vjeç. Ata akuzohen për posedim dhe shtije droge.

Ishte policia e Komisariatit Garibaldi Venezia, të cilët pas një hetimi mësuan se një burrë mbante një sasi të madhe droge në një apartament.

Policët vunë re 45-vjeçarin në bordin e makinës së tij pranë Viale Monza, teksa ishte duke dorëzuar një zarf të kuq tek një 27-vjeçar po ashtu shqiptar i cili pasi u kontrollua më pas, u zbulua se mbante dy pako heroinë me peshë rreth 1 kilogram.

Më pas policët zbuluan në makinën e 45-vjeçarit 2 mijë euro në çantën e tij të shpinës.

Ndërsa gjatë kontrollit në banesën e tij në via Ruccellai agjentët gjetën dhe sekuestruan 19 kg kokainë, 20 kg heroinë, 160 kg lëndë prerëse, 5,500 euro, material për përpunimin dhe paketimin e drogës: një presë e madhe metalike, tre furra me mikrovalë, dy përzierës të mëdhenj, kimikate të lëngshme dhe dy maska ​​me gaz.

Nëse droga e gjetur do të hidhej në treg do të kishte sjellë rreth 3 milionë euro fitime.