Drejtori i Burgut të Rrogozhinës, Bilal Hasa, është lënë i lirë ditën e sotme, pasi u vetëdorëzua një ditë më parë për akuzën e kultivimit të kanabisit.
Gazetari Besmir Pula, në një lidhje për “MCN Live”, bëri me dije se Hasa do të hetohet në gjendje të lirë, ndërsa në kërkim është shpallur vëllai i tij, për të cilin dyshohet se mund të jetë i përfshirë në kultivimin e lëndës narkotike.
Sipas hetimeve paraprake të policisë së Elbasanit, ka dyshime se Hasa nuk ka lidhje të drejtpërdrejtë me drogën e kultivuar në magazinat e zbuluara në Peqin, çka ka sjellë vendimin për ta hetuar në gjendje të lirë.
Pas operacionit policor, Hasa u vetëdorëzua dhe u mor në pyetje, ku ka mohuar çdo përfshirje në aktivitetin e paligjshëm. Ai ka deklaruar se prej muajsh nuk kishte shkuar në ambientin ku u zbuluan bimët dhe se nuk kishte dijeni për atë që zhvillohej aty.
Ndërkohë, mësohet se objekti ku u gjetën rreth 4 mijë rrënjë kanabisi është në pronësi të tij.
Burime bëjnë me dije se në kërkim është shpallur vëllai i tij, Romario Hasa, i cili dyshohet të jetë personi i përfshirë në kultivimin e drogës.
Po ashtu, për këtë rast është shpallur në kërkim edhe përgjegjësi i OSHEE-së për zonën e Peqinit, Ervis Maçi, i cili akuzohet për shpërdorim detyre.
Pritet që Prokuroria e Elbasanit të dalë me një qëndrim zyrtar, pasi të shqyrtojë materialet e referuara nga policia dhe provat e mbledhura gjatë hetimeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
