Familjarët e Ervis Martinajt, i cili është shpallur i zhdukur që vitin e shkuar, kanë ankimuar vendimin e GJKKO-së, për sekuestrimin e 34 pasurive të tij.
Ato kërkojnë që pasurive t’u hiqet sekuestroja.
Gjykata e Posaçme e Apelit për Korrupsionin dhe Krimin e Organizuar, ka regjistruar çështjen nr. 48 akti, datë 07.03.2023, mbi ankimin e paraqitur nga ankuesit A.K., D.K., D.M., E.M., E.M., F.V., M.M., R.M., V.M., ndaj vendimit nr. 5, datë 23.01.2023 të Gjykatës së Posaçme të Shkallës së Parë për Korrupsionin dhe Krimin e Organizuar që ka disponuar mbi sekuestrimin e disa pasurive.
Po në ditën e sotme, në orën 11:00, u hodh shorti elektronik, duke përcaktuar për shqyrtimin e çështjes në fjalë, trupën gjyqësore të përbërë nga gjyqtarët Dhimitër Lara (kryesues), Nertina Kosova (anëtare) dhe Florjan Kalaja (anëtar).
Ishte, Prokuroria e Posaçme (SPAK) ajo që sekuestroi pasuritë e Ervis Martinajt, i cili është shpallur i zhdukur që prej gjashtë muajve.
Operacioni është përqendruar në Lezhë dhe Fushë Kuqe, zonë ku ndodhen familjarët e tij.
Bëhet fjalë për 34 pasuri në total, në zotërim të Martinajt dhe familjarëve të tij.
Përfshihen disa makina, lokale, kompani, apartamente, kazino, toka dhe llogari bankare të fëmijëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
