Policia e Durrësit ka arrestuar një 46-vjeçar, pasi gjatë kontrollit në makinë i janë gjetur kallëpe tritolit, të cilat do t’i shiste kundrejt një vlere monetare. Arrestimi i tij është kryer gjatë operacionit “Mbikalimi”, ndërsa policia ka ushtruar kontroll edhte në banesën e shtetasit N.K., ku është gjetur një sasi e lartë tritoli dhe granata ofensive.
Operacioni është zhvilluar nga Komisariati i Policisë Durrës në bashkëpunim me DVP Kukës. Është sekuestruar 1 armë zjarri, 19.5 kallëpe tritol, 10 kapsolla detonatore, 20 granata ofensive dhe 20 ndezësa. Poseduesi i tyre është arrestuar në flagrancë, i cili do t’i shiste kundrejt fitimit.
“Specialistët për Hetimin e Krimeve në Komisariatin e Policisë Durrës, në bashkëpunim me strukturat hetimore të DVP Durrës, në vijim të punës për goditjen e paligjshmërisë, kapjen e personave që lëvizin me armë zjarri ose sende të kundraligjshëm dhe rritjen e parametrave të sigurisë në qytet, në bazë të informacioneve të siguruara nga seksioni për Hetimin e Krimeve, organizuan punën dhe finalizuan me sukses operacionin policor të koduar ‘Mbikalimi’, në kuadër të të cilit u arrestua në flagrancë shtetasi: N. K., 47 vjeç, banues në Tiranë, i dënuar më parë për veprën penale ‘Drejtimi automjeti në mënyrë të parregullt’”, thuhet në njoftimin e policisë.
Shërbimet e Policisë, në vëndin e quajtur “Mbikalimi i hekurit”, në Sukth, Durrës, kanë ndaluar shtetasin N. K., dhe gjatë kontrollit fizik iu gjetën dhe sekuestruan në cilësinë e provës materiale 16 kallëpe tritol dhe 10 kapsolla detonatore të cilat ky shtetas do t’i shiste kundrejt fitimit. Kontrollet kanë vijuar nga DVP Kukës, në banesën e shtetasit N. K., në Kukës, ku shërbimet e Policisë, gjetën dhe sekuestruan në cilësinë e provës materiale 1 armë zjarri, 3.5 kallepë tritol, 20 granata ofensive dhe 20 ndezësa.
Në bashkëpunim me Prokurorinë, Strukturat hetimore të DVP Durrës, po vijojnë punën për zbardhjen e plotë të kësaj veprimtarie kriminale, kapjen dhe arrestimin e personave të tjerë, të përfshirë në këtë veprimtari. Materialet i kaluan Prokurorisë së Rrethit Gjyqësor Durrës, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
