Thyen arrestin e shtëpisë për të shitur kokainë, arrestohet një person në Berat

Një person në Berat i cili ndodhej me masë sigurie “arrest shtëpie”, është vënë në prangat e policisë duke shitur kokainë.

Uniformat blu goditën një rast të armëmbajtjes pa leje dhe të shitjes në doza, të lëndëve narkotike.

Për rastin u vu në pranga shtetasi A. Z., 52 vjeç, banues në Poliçan.

Gjatë kontrollit fizik dhe gjatë kontrollit në banesën e këtij shtetasi, u gjetën lëndë narkotike kokainë dhe kanabis sativa, si dhe dy mjete prerëse dhe fishekë luftarak.

Ndërkaq, nga verifikimet e mëtejshme rezultoi se ai ishte me masë sigurie “Arrest në shtëpi”, për veprimtari kriminale në fushën e narkotikëve. 

Materialet procedurale iu referuan Prokurorisë së Beratit, për veprime të mëtejshme.