Avokati Kujtim Cakrani tha në MCN Live se duhet të heqim dorë nga prokuroria speciale, duke theksuar se strategjitë dhe planet e masave merren vetëm në vende me autokraci.
Ai kërkoi të ngrihet një strukturë në SPAK për të luftuar krimin kibernetik. I pyetur në lidhje me strategjinë e SPAK-ut për të parandaluar ndërhyrjet politike, Cakrani tha:
“Jemi i vetmi vend me dy prokurori, ku prokurori i përgjithshëm s’ka asnjë kompetencë. Prokuroria shqiptarë duhet t’i kthehet normalitetit dhe duhet të heqim dorë nga prokuroria speciale. Nuk besoj te platformat speciale. Strategjitë dhe planet e masave merren vetëm në vende me autokraci”.
I pyetur sa i rrezikuar është SPAK-u nga grupet kriminale, Cakrani tha:
“Duhen rekrutuar vajza dhe djem të rinj që kanë njohuri të thelluara në informatikë dhe kibernetikë, pasi është një luftë ku po rriten standardet e krimit të organizuar. Policia dhe Prokuroria me të drejtë kanë ngritur këtë alarm. Mendoj që janë shumë pas sa i përket luftës me krimin kibernetik, dhe deri më tani e kanë humbur këtë luftë. Arrestohen vetëm persona që lënë gjurmë, 1 në mijë”.
I ndalur te shantazhi që u bëhet prokurorëve nga grupet kriminale dhe politika, Cakrani u shpreh:
“Nuk besoj te kërcënimi i grupeve kriminale. Edhe pjesa që ndihen të kërcënuar nga politika, edhe kjo s’qëndron. Politika dhe prokuroritë janë gjithmonë në një luftë të ashpër me njëri-tjetrin. Nëse ata s’e mbajnë presionin të dorëhiqen dhe të lënë njerëz të tjerë. Këto pretendime të prokurorëve të SPAK-ut i gjej banale dhe fyese, nuk justifikohet paga 10 mijë euro me pretendimin se po kërcënohem”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
