Përplas me makinë të dashurën, vihet në pranga i riu shqiptar në Itali

Një 21-vjeçar shqiptar është vënë në prangat e policisë së Bolzanos në Itali, i akuzuar për vrasje të mbetur në tentativë ndaj të dashurës së tij.

Hetimi që çoi në prangosjen e shqiptarit nisi pas një ngjarje të ndodhur jashtë një ambienti publik në Bolzano, ku një vajzë u përplas nga një makinë, drejtuesi i së cilës u largua direkt pas ngjarjes.

Nga hetimet e kryera u zbulua se e reja, ishte e lidhur me të dyshuarin, i cili e kishte përplasur me makinë pas një debati mes tyre, duke i shkaktuar disa fraktura.

Policia zbuloi se i riu shqiptar kishte shfaqur edhe më parë veprime përndjekëse ndaj të dashurës, madje e kishte dhunuar fizikisht, raportojnë mediat italiane.

Lidhur me rastin në fjalë hetimet janë në vijim, për të zbuluar më shumë mbi të dyshuarin.