Arrestohet 25-vjeçari që u plagos në Durrës, gjatë kontrollit në banesë iu gjet armë dhe municion luftarak

Policia e Durrësit ka zbardhur ngjarjen e ndodhur mbrëmjen e djeshme në lagjen numër 4, ku mbeti i plagosur një person. Në pranga është vënë 25-vjeçari i përfshirë në konflikt, pasi gjatë kontrollit në banesën e tij u gjetën 1 armë zjarri automatik, 1 armë e ftohtë (thikë) dhe municion luftarak. Ndërsa vijon në kërkim autori i dyshuar i plagosjes së tij.

“Në vijim të veprimeve për zbardhjen e ngjarjes së ndodhur mbrëmjen e djeshme, në lagjen nr. 4, Durrës, në përfundim të veprimeve të para hetimore u arrestua në flagrancë (në ambientet e spitalit), shtetasi Arbër Tivari, 25 vjeç, banues në Durrës, i dënuar më parë për veprën penale ‘Prodhimi dhe shitja e narkotikëve’, si dhe u shpall në kërkim shtetasi Alket Buçpapaj, 28 vjeç, banues në Durrës, i dënuar më parë për veprën penale ‘Armëmbajtja pa leje’”, njoftoi policia.

Nga veprimet hetimore ka rezultuar se më datë 22.03.2021, rreth orës 19:20, në lagjen nr. 4, Durrës, pas një konflikti fizik të çastit dhe më pas me përdorimin e armëve të zjarrit, shtetasi Alket Buçpapaj ka plagosur me armë zjarri në krah, shtetasin Arbër Tivari, i cili ndodhet nën kujdesin e mjekëve, jashtë rrezikut për jetën. Gjatë kontrollit të ushtruar në banesën e shtetasit Arbër Tivari, shërbimet e Policisë kanë gjetur 1 armë zjarri automatik, 1 armë të ftohtë (thikë), një kapuç në ngjyrë të zezë dhe municion luftarak, të cilat u sekuestruan në cilësinë e provës materiale.

Nën drejtimin e Prokurorisë së Rrethit Gjyqësor Durrës, vijon puna për zbardhjen e plotë të rrethanave të ngjarjes dhe për kapjen e shtetasit Alket Buçpapaj. Materialet i kaluan Prokurorisë së Rrethit Gjyqësor Durrës, për veprat penale “Vrasja me dashje” e mbetur në tentativë dhe “Armëmbajtja pa leje” në ngarkim të shtetasit Alket Buçpapaj, si dhe për veprat penale “Mbajtja pa leje e armëve në banesë” dhe “Mbajtja pa leje e armëve të ftohta”, në ngarkim të shtetasit Arbër Tivari.