Vlorë, një person tenton të fusë nëpërmjet portit 30 mijë euro të padeklaruara

Një person ka tentuar të fusë në Shqipëri përmes portit të Vlorës, 30 mijë euro, pa i deklaruar.

Në vijim të kontrolleve të kryera nga shërbimet e Policisë Kufitare të portit të Vlorës, në bashkëpunim me autoritetet doganore, me objektiv parandalimin dhe goditjen e paligjshmërive në kufi, në hyrje të Shqipërisë, është kaluar në vijën e dytë, për kontroll të detajuar, automjeti tip “Toyota”, me drejtues shtetasin M. A..

Nga kontrollet, në kroskotin e këtij automjeti u gjetën 30 000 euro, të cilat shtetasi M. A., tentonte t’i fuste në Shqipëri, pa i deklaruar konform ligjeve në fuqi.   

Në vijim të veprimeve procedurale për rastin, u referuan materialet në Prokurori, ku nisi procedimi në gjendje të lirë për shtetasin M. A., 44 vjeç, banues në Vlorë, për veprën penale “Mosdeklarimi në kufi i të hollave dhe i sendeve me vlerë”.  

Gjithashtu, në cilësinë e provës materiale u sekuestrua shuma e parave.