U tentua të kamuflohej autori i aksidentit me vdekje në Laç, arrestohet i dyshuari, në pranga dhe një tjetër

I dyshuar për aksidentin me vdekje të një personi në fund të majit në Laç, vihet në prangat e policisë, ku hetimet zbuluan se si u tentua të fshihej autorësia e ngjarjes.

Në vijim të veprimeve hetimore për aksidentin me pasojë vdekjen e një 59-vjeçari, pas identifikimit dhe shpalljes në kërkim të autorit të dyshuar, kanë vijuar kërkimet për kapjen dhe vënien e tij në pranga.

Si i dyshuar u arrestua T. N., 35 vjeç, i cili ishte shpallur në kërkim, pasi më datë 29 maj, në aksin rrugor “Mbikalimi i Patokut-Laç”, ka aksidentuar me pasojë vdekjen shtetasin F. H., 59 vjeç, banues në Kurbin, dhe pas aksidentit është larguar nga vendngjarja.

35-vjeçari u ndalua në zbatim të vendimit të Gjykatës së Shkallës së Parë të Juridiksionit të Përgjithshëm Lezhë, e cila ka caktuar masën e sigurisë “Arrest në burg”, për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.

Gjithashtu, në vijim të hetimeve, nën drejtimin e Prokurorisë, u arrestua në flagrancë edhe A. B., 23 vjeç, për veprat penale “Deklarim i rremë para oficerit të policisë gjyqësore” dhe “Veprime që pengojnë zbulimin e së vërtetës”.

Arrestimi i tij u bë pasi gjatë veprimeve procedurale ka dhënë deklaratë të rremë para oficerit të policisë gjyqësore, duke pretenduar se ishte ai drejtuesi i automjetit që shkaktoi aksidentin, ndërkohë që nga aktet hetimore është provuar se drejtues i automjetit ishte shtetasi T. N.